Blers da nus passentan pliras uras al di cun utilisar l'internet per chaussas dal mintgadi sco guardar videos, far cumpras, giugar e per pajar quints enfin a l'administraziun da projects cumplexs e communicaziun confidenziala via videotelefonia. Ina rait privata virtuala (VPN) è ina da las meglras opziuns per garantir la sfera privata e la segirezza online e per proteger tias datas persunalas.
Co funcziunan VPNs?
In VPN è in instrument che ta permetta dad acceder a l'internet a moda segira danunder ch'i saja. In VPN funcziuna cun crear in «tunnel» segir tranter tes apparat e tes purschider da VPN ed el ta protegia en duas manieras fundamentalas:
- El zuppenta tia adressa IP per che tia identitad e tes lieu actual vegnian protegids.
- El criptescha tes traffic da datas tranter tai e tes purschider da VPN uschia che nagin en tia rait locala n'al po decriptar u modifitgar.
En il passà vegnivan VPNs utilisads per regla dad interpresas per pussibilitar l'access a distanza segir a lur servetschs interns ed a las datas proprietaras da l'interpresa. Ozendi percunter stattan VPNs a disposiziun a mintgin che vuless proteger sia connexiun cun l'internet, surtut sch'i sa tracta da raits malsegiras sco WLANs publics, ma els èn schizunt nizzaivels sch'i sa tracta dad ina rait privata a chasa.
In VPN protegia il traffic da datas tranter tai e tes furnitur da VPN, saja quai via tes navigatur, tias applicaziuns u ulteriurs servetschs. Per configurar in VPN stos ti crear in conto cun in purschider da VPN ed installar la software da VPN sin tes computer u telefon. Sch'il VPN è activà vegn quel a gestir il traffic da datas da tut las applicaziuns e la software installadas sin tes apparat. Uschia pos ti navigar e communitgar libramain via ina connexiun da rait privata e segira.
In purschider da VPN porscha per regla ina retscha da gateways da connexiun en differents lieus sin l'entir mund. Quai ta permetta dad utilisar in'adressa IP dad ina posiziun geografica che n'è betg tia atgna. Uschia vesa il lieu cun il qual ti es connectà l'IP da tes VPN e betg tia adressa IP effectiva sco funtauna da tes traffic. Mozilla VPN maina tes traffic tras in server segir e ta lascha tscherner in lieu en passa 30 pajais.
Cura duess jau utilisar in VPN?
Ina connexiun cun ina rait WLAN publica po esser pratica, per exempel sche ti n'has nagin'autra connexiun d'internet u nagins stritgins sin tes telefon. Da l'autra vart po la connexiun cun ina rait WLAN publica esser ristgusa. I n'è betg pussaivel da verifitgar che nagin auter saja connectà cun la medema rait per spiunar e vegnir a savair tge che ti fas. Schizunt sche tes traffic è criptà pon auters vesair las websites che ti visitas. E sche ti utiliseschas in'applicaziun betg criptada – talas datti anc ozendi bleras – pon auters vesair potenzialmain tut quai che ti fas gist.
Sche ti es a chasa è la ristga pli pitschna ch'insatgi cun nauschas intenziuns cumparia en tia rait da chasa. Tes purschider d'internet po tuttina fastizar e cundivider tias activitads online perquai che tut las datas che ti retschaivas da l'internet vegnan tramessas tras la rait da tes purschider d'internet ch'è eventualmain gnanc criptada. In VPN po impedir che purschiders d'internet ta spiuneschian cun criptar tes traffic cun tes purschider da VPN independentamain da tes lieu.
Spetga in mument, jau hai pensà che mes traffic d'internet saja gia criptà cun agid da HTTPS…
Igl è correct che las bleras connexiuns cun websites èn segiradas ozendi cun HTTPS. Quai munta ch'il cuntegn è criptà, dentant betg l'adressa IP da la funtauna u quella da la destinaziun. In VPN porscha ina protecziun da datas supplementara cun impedir che websites e terzas partidas vegnian a savair tia adressa IP.
Pertge duess jau utilisar in VPN?
Zuppentar l'identitad ed il traffic da datas dal web para dad esser insatge che mo persunas tecnologicamain super versadas fan, u lura glieud cun intenziuns dubiusas. Ma i dat in pèr motivs legitims per utilisar in VPN, per exempel:
- Mantegnair privatas tias activitads online.
- Zuppentar la posiziun da tes dachasa u dals lieus che ti visitas savens.
- Proteger tia connexiun cun ina rait WLAN publica, per exempel en in café, a l'eroport, en ina butia u biblioteca.
- Garantir la confidenzialitad ed integritad da tes access a l'internet.
- Difficultar a raits da reclama dad utilisar tia IP per crear profils per reclama persunalisada che registreschan tia navigaziun en il web.
Tge èn ils dischavantatgs dad in VPN?
Tscherts purschiders da servetschs blocheschan visitas via VPNs e rendan inaccessibels lur cuntegns sch'in VPN è activà. Insaquants VPNs ta ralenteschan u limiteschan tes volumen da datas transferibel. Ed auters VPNs han ina reputaziun dubiusa en connex cun la protecziun da datas e la segirezza da lur utilisaders.
Èn VPNs segirs?
Igl è fitg difficil da chattar in VPN fidabel. VPNs duessan avair l'intenziun da proteger lur utilisaders cura che quels èn online, ma betg tut ils VPNs porschan in servetsch da medema qualitad. Sche ti es a la tschertga dad in servetsch da VPN, fa la segira che ti hajas chapì la cundiziuns che ti acceptas. Blers servetschs pretendan da porscher ina qualitad excellenta e che la sfera privata als stettia a cor, ma blers na tegnan betg pled. Tscherts VPNs registreschan tias activitads online per pudair vender tias datas ed infurmaziuns ad interpresas da marketing. Auters VPNs emprovan da ta surmanar dad installar software nuschaivla sin tes apparats.
Nus ans avain dà gronda fadia per garantir che Mozilla VPN respectia propi tia sfera privata. E nus na ristgain betg nunponderadamain nossa reputaziun. Mozilla ha in bun num ed è enconuschent per concepir products che gidan da proteger tias datas. Nus respectain noss princips per la protecziun da datas formulads cler e net senza frasas vidas ch'ans permettan d'ans focussar mo sin las datas che nus duvrain per porscher noss servetschs. La tecnologia Mozilla VPN cumpacta e moderna offra als utilisaders ina connexiun svelta cun la protecziun e segirezza cumpletta dad in VPN. E cunquai ch'il sviluppaders da quest VPN vegnan sustegnids dad ina interpresa cun princips, pos ti ta fidar che ti survegns per ils daners che ti spendas per quest product in VPN d'emprima classa e promovas ultra da quai era in meglier internet per tuts.
Pon VPNs ma proteger da cybercriminals?
Malgrà ch'in VPN porscha ina connexiun segira a l'internet n'è el betg en cas da ta proteger da tuts cun nauschas intenziuns en quest mund. Mintga giada che ti es online, cun u senza in VPN, duessas ti esser precaut cun colliaziuns suspectusas, campagnas da dischinfurmaziun, engions da phishing ed auters privels. Per restar segir en l'internet dovri ina conscienza adequata en il mintgadi.
Èn VPNs legals?
L'installaziun e l'utilisaziun dad in VPN è actualmain legala en ils blers pajais, inclusivamain ils Stadis Unids, il Reginavel Unì, il Canada e la Nova Zelanda, ma tscherts pajais reglamenteschan eventualmain l'utilisaziun. Sche ti ta decidas d'utilisar in VPN es ti responsabel da controllar a maun da las leschas dal pajais sche l'utilisaziun è legala u betg.
Èn VPNs mo per computers?
VPNs pon vegnir utilisads per proteger tut tes apparats – computers, laptops, tablets e telefonins. Sche ti accedas a l'internet via applicaziuns independentas da tes navigatur è in VPN ina buna decisiun per proteger tia sfera privata e garantir tia segirezza sin mintga apparat. Ti stos installar in VPN sin mintga apparat per ch'i funcziunia. Mozilla VPN porscha ina connexiun illimitada per maximalmain tschintg apparats, sin ils quals ti pos ta connectar cun mintga app u navigatur cun l'internet.
Mozilla VPN: svelt, segir, fidabel
Mozilla VPN è in servetsch al qual ti pos ta fidar per proteger tia connexiun cun l'internet da tut tes apparats. Nus na preservain betg ils protocols da tias activitads en la rait e na collavurain era betg cun terzas partidas che creeschan profils da quai che ti fas online. En in mund en il qual l'imprevisibilitad è daventada la «nova normalitad», savain nus ch'igl è pli impurtant che mai che ti ta sentias segir e che ti sappias che quai che ti fas online reguarda mo tai.