Raits privatas virtualas (VPNs) e web proxies segirs èn soluziuns per meglierar la protecziun da datas e la segirezza en l'internet, ma i po dar confusiuns cun eruir la soluziun la pli adattada per tai. Qua vegns ti a savair co che quests servetschs ta protegian e co ti tschernas la meglra opziun per tes basegns durant che ti es online.
Evitescha che purschiders d'internet ta spiuneschian
Sche ti utiliseschas Firefox impedescha la protecziun avanzada cunter fastizaders automaticamain che blers fastizaders web da terzas partidas ta suondian en il web. Ma i dat in fatg interessant: Tes purschider d'internet – il qual ti pajas per pudair acceder a l'internet – po tuttina t'observar e ta suandar.
Cunquai che tes traffic d'internet circulescha via tes purschider d'internet (ISP) da ed a tes apparats (computer, telefon, televisiun, tablet), sa quel nua che ti ta chattas en l'internet. In purschider d'internet po vesair las websites che ti visitas, quant ditg che ti restas sin quellas, tes lieu e tschertas infurmaziuns davart tes apparats. Eventualmain na sa tes purschider d'internet grazia al criptadi betg exactamain tge che ti has fatg sin questas websites (per exempel tge che ti has cumprà, tschertgà u legì), ma el po trair sias conclusiuns sin basa da las websites che ti has visità. Questas datas pon vegnir utilisadas per crear profils detagliads da tai. Pertge è tes purschider d'internet interessà da far quai? Curt e bain: Questas datas èn da gronda valur.
Purschiders d'internet pon utilisar questas infurmaziuns per atgnas reclamas persunalisadas u per pussaivladads da monetarisaziun sco la cundivisiun da tias datas cun terzas partidas interessadas da data mining, marketing e reclamas persunalisadas. Quai munta damain protecziun da datas e dapli fastizaders. La navigaziun en il modus privat n'impedescha betg che purschiders d'internet ta suondian en l'internet. Ma sche ti fas circular tes traffic da web via ina web proxy u in VPN daventi bler pli difficil.
Cura duessas ti tscherner in VPN u in proxy segir?
VPNs e web proxies segirs han ina finamira cuminaivla: els protegian connexiuns. Els zuppentan tia adressa IP originara e protegian tes traffic web tranter tai e tes purschider da VPN u tes purschider dad in proxy segir. Cura èsi dentant raschunaivel dad utilisar in VPN empè dad in proxy?
In web proxy segir: protecziun a nivel dal navigatur
In web proxy segir funcziuna per quai che capita sulettamain en tes navigatur. Quai pon esser bleras activitads sco per exempel far cumpras, pajar quints, s'annunziar en medias socialas e leger e-mails. In web proxy segir serva sco intermediatur tranter tes navigatur e l'internet. Las datas da tia navigaziun en il web passan directamain da tes navigatur tras in tunnel segir en l'internet, uschia che tia adressa IP vegn zuppada ed il server web che ti contacteschas na sa betg exactamain nua che ti ta chattas en il mund. E quai renda pli difficil da ta fastizar e da ta prender en mira.
In proxy è nizzaivel cura che ti navigheschas cun agid dad in WLAN public en il web. Sch'in proxy è activà vegn quel ad impedir che spiuns en la medema rait observian tia navigaziun u legian tias transacziuns sin websites betg criptadas. I na tuna betg privlus, ma raits WLAN publicas pon servir sco entrada clandestina per attatgaders.
Firefox Private Network è ina extensiun per il navigatur facila dad installar che porscha in tunnel segir e criptà al web per proteger tia connexiun dal navigatur dapertut nua che ti utiliseschas Firefox. Ella sa lascha activar a moda svelta e simpla mintga mument che ti la dovras per augmentar la segirezza en tes navigatur.
VPNs: protecziun a nivel da l'apparat
VPNs prestan dapli che proxies perquai ch'in proxy protegia mo quai che ti fas en tes navigatur, entant ch'in VPN protegia tes traffic da datas cumplet, inclusivamain tes navigatur, dapertut là nua che ti has in VNP installà ed activà. VPNs porschan dapli segirezza e protecziun da datas per tut tias activitads online – in factur impurtant sche ti vulessas tegnair tias activitads per tatez. Uschia daventi pli difficil per purschiders d'internet e fastizaders engurds da tias datas da crear in profil a basa da tuts tes apparats (sco tes telefonin, computer e tablet).
In VPN funcziuna cun crear in «tunnel» segir tranter tes apparat e l'internet. El protegia tia sfera privata en dus reguards:
- El zuppenta tia adressa IP, protegia uschia tia identitad e renda nunvisibla tia posiziun actuala.
- El criptescha tes traffic da datas tranter tai e tes purschider da VPN, uschia che nagin en tia rait locala n'al po decriptar u modifitgar.
In VPN porscha era segirezza en raits avertas e publicas da WLAN. WLANs averts pon esser ristgus perquai che ti na pos betg esser segir ch'insatgi auter na sa connectescha betg cun la medema rait per ta spiunar. Schizunt sche tes traffic è criptà pon auters vesair las websites che ti visitas. E sche ti utiliseschas in'applicaziun che n'ha nagin criptadi – anc ozendi è quai memia savens il cas – èsi pussaivel da vesair tut quai che ti fas en quell'applicaziun. Mozilla VPN è in servetsch svelt, segir e fidabel che gida dad eliminar quest manco da segirezza per tai. Mozilla VPN ta pussibilitescha era da tscherner tes «lieu» (danunder che tes traffic da datas para da vegnir) en ina glista da passa 30 pajais.
Tscherna in servetsch fidabel
Il pli impurtant da considerar en connex cun la decisiun per in servetsch VPN u proxy è la tscherna dad ina interpresa fidabla. Fa la segira che ti chapeschias las cundiziuns d'utilisaziun che ti acceptas. Blers pretendan da porscher ina buna qualitad e da garantir la protecziun da datas, ma blers na tegnan betg pled. Betg tut ils servetschs da proxy e da VPN èn propi segirs e privats. Tscherts protocolleschan tias activitads online per sez pudair vender tias datas ed infurmaziuns ad interpresas da marketing. Auters servetschs emprovan schizunt da ta persvader dad installar software nuschaivla sin tes apparats.
Nus ans avain dà gronda fadia per garantir che tant Mozilla VPN sco era l'extensiun da proxy Firefox Private Network respectian propi tia sfera privata. E nus na ristgain betg nunponderadamain nossa reputaziun. Mozilla ha in bun num ed è enconuschent per concepir products che gidan da proteger tias datas. Nus respectain noss princips per la protecziun da datas formulads cler e net senza frasas vidas ch'ans permettan d'ans focussar mo sin las datas che nus duvrain per porscher noss servetschs. Ed essend che nus vegnin sustegnids dad ina interpresa cun princips, pos ti ta fidar che nus n'investin ils daners che ti spendas per quest product betg mo per segirezza maximala, mabain era per meglierar l'internet per tuts.