Firefox slědowanje přez porstowe wotćišće blokuje
Što je slědowanje přez porstowe wotćišće?
Wutworjenje porstowych wotćišćow je typ přesćěhowanja online, kotrež je bóle inwaziwne hač wšědne přesćěhowanje na zakładźe plackow. Digitalny porstowy wotćišć so wutworja, hdyž předewzaće jónkróćny profil na zakładźe wašeje kompjuteroweje hardware, software, přidatkow a samo nastajenjow wutworja. Waše nastajenja kaž wobrazowku, kotruž wužiwaće, pisma, kotrež sće na swojim ličaku instalował, a samo webwobhladowak, kotryž wužiwaće, dadźa so wužiwać, zo bychu porstowy wotćišć wutworili.
Jeli maće powšitkownje zwučeny laptop, PC abo šmóratko, móže ćešo być, waš grat z pomocu porstowych wotćišćow jónkróćnje identifikować. Ale, čim wjace jónkróćne přidatki, pisma a nastajenja maće, ćim lóšo je, zo něchtó was najskerje namaka. Předewzaća móža tutu jónkróćnu kombinaciju informacijow, zo bychu waš porstowy wotćišć wutworili. Tohodla Firefox znate wutworjenje porstowych wotćišćow blokuje, zo byšće móhł hišće waše najlubše rozšěrjenja, drasty a přiměrjenja wužiwać, bjeztoho zo by wam wabjenje slědowało.
Slědowanje přez porstowe wotćišće je špatne za web
Praksa wutworjenja porstowych wotćišćow zmóžnja, was po měsacach slědować, samo hdyž skład wobhladowaka prózdniće abo priwatny modus wužiwaće – njedźiwajo na jasne skedźbnjenja, zo nochceće, zo něchtó wam slěduje. Najebać nimale dospołne dojednanje mjez standardami, gremijemi a poskićowarjemi wobhladowakow je te wutworjenje porstowych wotćišćow je škódne, jeho wužiwanje we webje je stajnje w zańdźenym dekadźe přiběrało.
Firefox slědowanje přez porstowe wotćišće blokuje
Najnowši wobhladowak Firefox wam před wutworjenjom porstowych wotćišćow škita. Blokuje naprašowanja třećich poskićowarjow na předewzaća, kotrež su znate za wobdźělenje na wutworjenju porstowych wotćišćow. Smy ćežko dźěłali, zo bychmy tutón škit priwatnosće zmóžnili, bjeztoho zo bychmy websydła wobškodźili, kotrež rady wopytujeće. (Čitajće wjace tu, jeli chceće techniske podrobnosće.)
A njeje hłuboke nastajenje, kotrež dyrbiće wuhrjebać, zo byšće jo namakał. W najnowšim wobhladowaku Firefox je blokowanje porstowych wotćišćow standard, standardne nastajenje. Wopytajće swoju desku za škit priwatnosće, zo byšće widźał, kak wam za kulisami slěduja a kak Firefox tomu zadźěwa.
Najskerje so wam njespodoba, hdyž něchtó wašim pohibam we woprawdźitym žiwjenju slěduje. Njeje žana přičina, to online akceptować. Jeli Firefox hišće nimaće, sćehńće jón a škitajće so před digitalnym wutworjenjom porstowych wotćišćow.
